رؤية تحليلية عن تنظيم قطر لـ كاس العالم 2022

 قضيت حوالي 10 أيام في قطر حضرت فيهم 4 مباريات وحابب أتكلم عن تجربة كأس العالم في قطر بعيداً عن الحزق والمزايدات والشعبوية اللي شغالة من كل جانب دي.

• طبعا تنظيم المباريات اللي انتم شايفينه في التلفزيون دة ممتاز ولا غبار عليه.
  لكن

• #قطر دي مش دول تستضيف حدث من النوعية دي. الموضوع مش موضوع فلوس وبس. وعمرنا ما شفنا أيسلندا مثلا بتسعى لتنظيم كاس العالم وقادرين يعيشوا عادي خالص من غير ما يكونوا “أول دولة اسكندنافية تستضيف كاس عالم”.

مونديال_قطر2022

• القطريين مش فاهمين طبيعة الحدث ولا طبيعة جمهور كرة القدم ومش قادرين يخرجوا برة دايرة “الزبون اللوكس اللي هنوفرله خدمات لوكس وغالية عشان ييجي يحس انه ملك”. جمهور كرة القدم أبعد ما يكون عن الكلام دة.
• الفنادق الشاهقة الماهقة أغلبها فاضي عشان أسعارها غالية جدا وجمهور الكرة لا يعنيه الخمس نجوم والعشر نجوم والترف الخليجي المبالغ فيه دة
• الlandscape بتاع دولة زي قطر لا يؤهلها لاستضافة حدث بيقوم في الأصل على سير وتنزه أعداد غفيرة من الجماهير في الشوارع! وطبعا دي بلد محدش بيمشي فيها من غير عربية أساسا!

#مونديال_قطر2022 #قطر

• الأسلوب الخليجي ونظرا لجغرافية المكان بيقوم على الأماكن المغلقة ومراكز التسوق، وللأسف دة خلى التجربة الوحيدة للتمشية وسط الجماهير في سوق واقف. اللي الخدمات فيه مستواها متواضع جدا جدا لأنهم مش متعودين على استقبال عدد كبير من الناس مرة واحدة. 

مونديال_قطر2022 #Qatar2022

أنا شخصيا اتخانقت مرتين تلاتة بسبب سوء الخدمة في كذا مقهى أو مطعم في السوق وطبعا النظام الخليجي بيعاقبك لو ماروحتش الأماكن “اللوكس” اللي في المولات والفنادق.

• ما يسمى بالfan zones تحسها جزء من مهرجان صلالة للتسوق مش كأس عالم لكرة القدم.
• جمهور الكرة وخصوصا في السفر بيكون نشاطاته فعلا قايمة على استهلاك الكحول قبل وبعد المباريات (وايوة محدش هيموت لو مشربش كحول كم يوم) انما النتيجة ان جماهير أوروبية كتير أصلا راحت قعدت في دبي وبقت تروح قطر عالماتشات فقط وترجع دبي تاني. 

على فكرة فنادق قطر بتقدم كحوليات عادي خالص لا يكون حد فاكر ان البلد مانعة الكحول من بابه”نصرة للإسلام”!

-البلد وبرضه بسبب النظام والعقلية الخليجية،موقفة عمال غلابة في كل متر يقولولك تمشي منين وتقف فين بطريقة مبالغ فيها جدا تخليك تحس انك عيل صغير ومتراقب طول الوقت! 

مع ان كم يافطة يسهلوا الموضوع دة كله انما العقلية الخليجية مصممة على استعباد شوية غلابة عشان يأكلوك في بقك وطبعا الزبون العربي بيعشق الكلام دة لكن بالنسبة لي كان شيء قبيح جدا.

• كأس العالم محتاج دولة عندها شعب، وبنية تحتية محدثة وموجودة من زمان حتى لو تحديثها مخصوص لاستضافة البطولة، وهوية ما وفهم الشعب دة لكرة القدم كلعبة ويكون عند الشعب دة شغف ولو قليل باللعبة. #قطر معندهاش كل دة.

بقلم: Amro Hassan